Claudine Muno: Komm net kräischen

Évaluer cet élément
(16 Votes)

Sprooch: Lëtzebuergesch
Erzielung

Lëtzebuerger Buchpräis 2016 (Fiktioun)

Op der Lay 181

2015, 2. Oplo 2016, 112 Säiten

ISBN 978-2-87967-211-3

10,90 €uro


Am Webshop vun Op der Lay kafen

Well et nawell vill mat senge musikaleschen Optrëtter a Produktioune beschäftegt war, huet d'Claudine Muno elo no laanger Zäit eng Erzielung geschriwwen. Komm net kräischen huet wuel och deen een oder aneren a senger Jugend ze héiere kritt. An dorëms geet et an deem neie Buch vun dëser lëtzebuergescher Schrëftstellerin, déi bis elo nach ëmmer als dat Jéngst eemol de Servais-Präis kritt hat.

Gesanksunterrecht mam Paul, eng Klassefaart op London an d'Eltere mat hire Warnungen – dat fënnt sech alles an dëser Erzielung. Interessant ass virun allem déi stilistesch Weiderentwécklung vum Claudine Muno am Lëtzebuergeschen. Hatt ass net do stoe bliwwen, wou et virun e puer Joer opgehalen huet. Mä iwwerzeegt Iech selwer!
Aner Romaner vum Claudine Muno: op Lëtzebuergesch De Fleeschkinnek (2. Oplo) a Frigo (Servais-Präis 2004) (3. Oplo), Koma a Moundkälwer, op Däitsch Träume, aus denen man zu spät aufwacht (2. Auflage), op Franséisch 21 an op Englesch The Moon of the Big Winds (leider vergraff!). Och e klenge Comic vum Claudine ass bei Op der Lay erauskomm: D'Welt geet ënner, Nils Poulet. Enn 2009 koum e Buch mat Geschichten, Dat klengt Buch vun der Doudangscht, eraus, wat 2010 mam Lëtzebuerger Buchpräis (Literatur) ausgezeechent gouf. Am Frëijoer 2011 ass op Fransëisch La Mamouthe erschéngen.

Well d'Claudine Muno och eng vun den talentéierste Singer-Songwriterinnen ass, wëlle mer och drop hiweisen, datt déi éischt CD Fish Out Of Water bei Op der Lay erschéngen ass. Februar 2006 ass och eng CD vu Claudine Muno & The Luna Boots bei Op der Lay erauskomm: Monsters (leider vergraff!).

Fir Kanner huet hatt mam Pascale Junker dräi Kannerbicher bei Op der Lay publizéiert: Dem Zoe seng Geschichten (3. Oplo), D'Zoe, Draachen a Siweschléifer (2. Oplo) an De Bier, deen eng Méck verschléckt hat.


Auszuch aus Komm net kräischen:

Während dem Marie senger Famill hiert Haus vertikal a rechteckeg war, mat schmuele rechteckege Fënsteren an engem laange rechteckege Gaard hannendrun, (déi genau Form vum Schiet, deen d’Haus zu enger bestëmmter Dageszäit hannert sech geworf huet), war dem Theo an dem Paul säin Haus rechteckeg an horizontal, mat breede rechteckege Fënsteren an zwee Gäert, engem virun an engem hannert dem Haus. An där Strooss huet en Dokter gewunnt an de Mann, deen d’Assurancë verkaaft huet. Hien ass mat senger Famill an der Vakanz op Disneyworld geflunn.

D’Marie huet an Italien um Camping Cola-Calypsoe giess an d’Topolinoe gelies, déi d’Kanner, déi schonn heemgefuer waren, dogelooss haten. Heiansdo huet e grousst Stéck Kartong vum Deckel oder der Récksäit gefeelt. Et huet ee Moment gedauert, bis d’Marie verstanen huet, dass déi Grouss sech aus dem Kartong Zigarettefiltere gedréint hunn. Sou séier ass dat gaang, vun engem Moment op deen anere waren d’Kanner scho keng Kanner méi.